Мистер Проспекор (Mr. Prospector)

Энэ жилийн Дубайн Дэлхийн цомын уралдаанд түрүүлсэн Монтеросо хэмээх хүлгийг Мистер Проспекторын 3 дахь үеийн төл гэж танилцуулж байсан билээ. Дубайн дэлхийн цомын уралдаан нь манай гаригийн хурдан морины ертөнцийн хамгийн том арга хэмжээнүүдийн нэг бөгөөд энэ уралдааныг үзэхээр дэлхийн өнцөг булан бүрээс 60-70 мянган хүн Дубайг зорьдог байна. Эрт дээр үеээс хурдан моринд дуртай Арабууд дэлхий даяар гайхагдсан уралдааныг эх нутагтаа зохион байгуулахаар шийдвэрлэж 1996 оноос Дубайн дэлхийн цомын уралдааныг зохион байгуулж эхэлсэн түүхтэй. Тэд энэ уралдаанд зориулж 2 тэрбум доллараар гайхамшигт Мейдан цогцолбор морин тойруулгыг барьсан юм. Мөн уралдааны шагналын санг хамгийн өндөр байлгасаар ирсэн байна. Энэ бүхний үр дүнд дэлхийн хамгийн хурдан хүлгүүд болон хурдан морины хорхойтнууд Дубайд цугладаг болж, Дубайн дэлхийн цомын уралдаан нь хамгийн нэр хүндтэй, дээд зэрэглэлийн уралдааны нэг болсон юм.
 Энэ уралдааны түрүү магнай Монтеросо нь цэвэр цусны адууны түүхэн дэх агуу азарганууд болох Умардын бүжигчин, Мистер Проспектор нарын 3 дахь үеийн төл. Домогт Умардын бүжигчний тухай манай клубээс маш олон удаа танилцуулж байсан бөгөөд энэ удаа шилдэг азаргануудын тухай буландаа хурдан морины ертөнцийн өөр нэгэн домог болсон Мистер Проспекторыг танилцуулъя.
Ер нь тусгайлан танилцуулаагүй боловч Мистер Проспекторыг манай хурдан морь сонирхогчид сайн мэдэх байх. Учир нь манай клубээс сүүлийн 5 жилийн турш тогтмол хүргэж буй дэлхийн топ уралдаануудын мэдээнд Мистер Проспекторын нэр олон гарсан байгаа. Мистер Проспектор нь үр удам нь хэдэн үеэрээ жигд хурдалж байгаа цэвэр цусны шилдэг азарга билээ. Ялангуяа түүний үр, төлүүд нь алдарт Гурван титмийн уралдаануудад тогтмол түрүүлдэг тул Мистер Проспекторыг Гурван титмийн доминант азарга гэж мэргэжилтнүүд үнэлдэг.
Мистер Проспектор буюу Ноён хайгуулчин хэмээх халтар азарга нь 1970 онд Кентакид төржээ. Тэрээр Унаган бүжигчний төл Рейз э Натив хэмээх азарганы төл бөгөөд эх нь Неарко-н 3 дахь үеийн төл Нашуа гэдэг гүү байжээ. Мистер Проспектор даага байхдаа 200,000 доллараар зарагдаж байсан нь тухайн үедээ өндөр үнэтэйд тооцогдож байв.
Мистер Проспектор хязаалан, соёолон насандаа 14 уралдахдаа Грейвсэнд Хандикап, Вирлэвэй Хандикап тэргүүтэй 7 уралдаанд түрүүлжээ. Гэхдээ дээд зэрэглэлийн уралдаанд түрүүлээгүй тул төдийлөн нэрд гараагүй байна.
Харин үржүүлгэнд орсноосоо хойш дэлхийн хамгийн алдартай адууны нэг болсон юм. Түүний үр удмаас Зенятта, Курлин, Лүүкин эт Лаки, Рүлер он Айс тэргүүтэй 29 адуу Бридерс Кап, Кентаки Дерби, Прикнес Стейкс, Белмонт Стейкс уралдаануудад 40 удаа түрүүлээд байна. Энэ баримт түүний төлүүд Гурван титмийн уралдаанууд үнэхээр давамгайлж уралддагийг харуулж байгаа билээ. Мөн Мельбурн Кап, Дубайн дэлхийн цом, Японы цом, Английн Гурван титмийн зэрэг дэлхийн бусад топ уралдаануудад ч түүний төлүүд олон түрүүлсэн байна. Мистер Проспекторын 165 төл нь ямар нэг уралдаанд түрүүлж байсан нь дээд амжилтанд тооцогддог юм. Мөн түүний үржүүлгийн төлбөр 1980-д оны үед 100,000-325,000 доллар байсан нь маш өндөрт тооцогдож байв. Форбс сэтгүүлээс Мистер Проспекторыг цэвэр үүлдрийн адууны түүхэн дэх хамгийн их орлого олсон 10 азарганы жагсаалтад оруулжээ.
Мистер Проспектор нь өөрийн шууд төлүүдийн амжилтаараа Америкийн шилдэг азарга цолыг 11 удаа хүртжээ. (Ledaing sire and Leading broodmare sire). Түүний удмын Дистортед Хюмор, Стрийт Край, Смарт Страйк азарганууд өнөөгийн шилдэг азарганд тооцогдож байна.
Мистер Проспекторын төл нэгэн даагыг Японы бизнесмен Фусао Секигүчи (Fusao Sekiguchi) 4 сая доллараар худалдан авч, Фусайчи Пегасус (Fusaichi Pegasus) хэмээн нэрлэжээ. Энэ адуу 2000 онд хязааландаа Кентаки Дерби-д түрүүлж ихэд нэрд гарсан байна. Харин Прикнес Стейкст түрүүлэх хамгийн өндөр магадлалтай адуунд тооцогдож байсан боловч түрүүлж чадаагүй байна. Улмаар Белмонт Стейкс-т ч уралдсангүй. Тэр намраа Фусайчи Пегасус-г Ирландын Күүлмоор жүчээ 64 сая доллараар худалдаж авсан нь хамгийн үнэтэй адуунд тооцогдож байв. (Зарим мэдээнд 60 сая доллар)
Мистер Проспекторыг 1999 онд амьсгаа хураахад нь Секретариат, Нижинскай хоёрын дунд оршуулжээ.
Эх сурвалж: www.mongoljockeyclub.com