Хэрхэн хөлслөх вэ?

Хурдан морины тарга хүчийг хүчийг буулгах арга нь хөлслөх юм. Морьдыг уяанд барьсан эхний нэг хоёр өдөр энгийн уяж өнжих, буюу уяа тойруулан гишгүүлж баалгах ба үүний хойно нэмнэн хөлсөлснөөөр уяаны идэвхтэй үйл ажилагаа эхэлдэг. Эхний хөлсийг тун зөөлөн авахгүй бол морь няцарч уяа эхнээсээ л эвгүйтэж мэднэ. Гэхдээ хэт зөөлөн явж хөлсийг дотогш нь оруулж бас болохгүй. Уяагаа нэлээд хэд тойрч шогшиж биеийг нь халаасны дараа салхи сөрөн хатируулж хоёр чихнийх нь угаар хөлс бөгжигнөөд ирэхийн үед эргэж салхины уруу дандаа зөөлөн цогиулсаар уяан дээрээ ирж буугаад мөн салхины нь уруу харуулан зогсоож, бага зэрэг гишгүүлэн байж хөлсийг нь хусна. Эхний 2-3 хөлсний дараа морины шавар хөлс дуусна. Энэ нь арьснаас гарч байгаа, үсний шороо тоостой холилдсон бохир хөлс байна. Түүний дараагийн хэдэн хөлсөөр арьсан доорх өөх гадагшлан өтгөндүү тосорхог байх ба үүнийг тосон хөлс гэдэг. Энэ хоёр хөлсний дараа шингэвтэр хөлс гарч ирэх ба түүнийг усан хөлс гэдэг. Зарим нэгэн нь үүнийг махнаас нь  ялгарч буй гэдэг. Үүний дараа буюу хамгийн сүүлд сувдан хөлс гарна. Энэ нь харьцангуй цаанаас буюу махны уг, бараг яснаас гарч байгаа хөлс гэж төсөөлж болно. “Ясны хөлс гарлаа” гэж ярианы хэлэнд байдаг шүү дээ! Энэ хөлсийг их авч болохгүй гэдэг юм.
Хөлсөнд морины тарга хүч бууж, бие нь тавирч, булчин шөрмөсүүд нь эрчимтэй ачаалалд дасч ирдэг байна. Хөлслөөд ирсэн морь хөрвөөмтгий байдаг нь бие сайхан амарч тавирч байгаагийн тэмдэг.Нэг сарын уяаны туршид дээд хоёр насны морийг 9-10 орчим удаа хөлсөлдөг.