2011 оны шилдэг 9 азарга

1. Говь-Алтай аймгийн Шарга сумын уугуул “АЛТАЙ КОНСТРАКШН” ХХК-ийн захирал Х.Бат-Эрдэнийн соёолон халтар азарга 2011 оны шилдэг азарганы чансааг тэргүүлжээ. Халтар азарга нь Тод манлай уяач Бандгаа хэмээх С.Ганхуягийн Станбул азарганы төл бөгөөд 2011 он гарсаар Дүнжингарав болон Булганхангайн хаврын бүсийн уралдаануудад тус тус түрүүлж, АХ-ын 90 жилийн ойн эрлийз дээд насны ангилалд аман хүзүүдсэн юм. Энэ цагийн эрхгүй хурдан хүлгэдийн нэгээр зүй ёсоор нэрлэгдэж буй халтар соёолон улс, бүсийн наадамд хоёр түрүүлж, нэг аман хүзүүдсэн амжилтаар жагсаалтын нэгдүгээрт эрэмбэлэгдэж буй нь энэ аж.
2. Дундговь аймгийн Өлзийт сумын уугуул, “Мон-Уран” ХХК-ийн захирал, аймгийн Алдарт уяач Б.Наранхүүгийн хээр азарга. Сүхбаатар аймгийн Түвшинширээ сумын уугуул аймгийн Алдарт уяач Пүрэвдоржийн унаган адуу бөгөөд 2011 он гарсаар Дүнжингаравын хурд хаврын бүсийн уралдаанд айргийн гуравт хурдалж, Нүүрэнтэйн хурд хаврын бүсийн уралдаанд түрүүлэн АХ-ын 90 жилийн ойн баяр наадамд аман хүзүүдсэн юм.
3. Сүхбаатар аймгийн Түмэнцогт сумын уугуул Монгол улсын Алдарт уяач С.Төмөр-Очирын Ембүү хэмээх хээр азарга нь өнөө жил “Дүнжинагаравын хурд”  болон “Нүүрэнтэйн хурд” хаврын бүсийн уралдаанд тус тус айрагдаж, АХ-ын 90 жилийн ойн баяр наадамд эрлийз гэсэн шалтгаанаар хасагдан давхар уяагаар “Говьшанхын хурд” төвийн бүсийн уралдаанд айргийн тавд хурдалсан юм. 
4. Сүхбаатар аймгийн Дарьганга сумын уугуул, УИХ-ын гишүүн, Монгол улсын Алдарт уяач Ч.Улааны зээрд азарга. Зээрд азарга нь Сүхбаатар аймгийн Асгат сумын уугуул аймгийн Алдарт уяач Ж.Баярсайханы унаган адуу бөгөөд дөрвөн том тэгш ой тохиосон өнөө жилийн төрийн их баяр наадамд айргийн гуравт хурдалж, давхар уяагаар Архангай аймгийн Батцэнгэл сумын нутаг Тоглохын талд болсон хангайн бүсийн даншиг наадамд аман хүзүүнд хурдалсан билээ.
5. Сүхбаатар аймгийн Түмэнцогт сумын уугуул Ч.Хүсэлзулын зээрд азарга. Зээрд азарга нь Сүхбаатар аймгийн Түмэнцогт сумын уугуул аймгийн Алдарт уяач Ө.Шинэтулгын унаган адуу бөгөөд дөрвөн том түүхт ой тохиосон энэ жилийн төрийн их баяр наадамд тод магнай торгон жолоо өргүүлсэн амжилтаар шилдэг азаргануудын нэгээр тодорч байна. Улсын наадамд Ч.Хүсэлзулын нэр дээр уралдаж байсан хээр зээрд Дундговь аймгийн 70 жилийн ойн баяр наадамд Б.Наранхүүгийн нэр дээр уралдан айргийн дөрөвт хурдалсныг морь сонирхогч эрхэм уншигч та бүхэн андахгүй бизээ.
6. Төв аймгийн Батсүмбэр сумын уугуул, “Босоо хүлэг” галын гишүүн, Монгол улсын Тод манлай уяач Ц.Батсайханы өсгий цагаан хонгор үрээ. Өсгий цагаан хонгор үрээ нь 2011 он гарсаар “Дүнжингаравын хурд” болон “Булганхангайн хурд 2011” хаврын бүсийн уралдаанд тус тус түрүүлж, АХ-ын 90 жилийн ойн баяр наадмын эрлийз дээд насны ангилалд мөн магнайдаа тоосгүй түрүүлсэн юм.
7. Өвөрхангай аймгийн Хужирт сумын уугуул, Манлай уяач, УИХ-ын дэд дарга Г.Батхүүгийн Соёмбо зээрд азарга. Зээрд азарга Төв аймгийн Сэргэлэн сумын уугуул Тод манлай уяач Д.Ононгийн унаган адуу бөгөөд өнөө жил “Дүнжингаравын хурд” болон “Нүүрэнтэйн хурд” хаврын бүсийн уралдаанд тус тус аман хүзүүдэж, улсын их баяр наадмаар эрлийз гэсэн шалтгаанаар хасагдан Өвөрхангай аймгийн 80 жилийн ойд түрүүлж, моринд хорхойтой Монголын ард түмнээ баясгасан билээ.
8. Төв аймгийн Өндөрширээт сумын уугуул, Улаанбаатар хотын харъяат А.Отгонбаяр Хилэн хар азарга. Хар азарга нь Сүхбаатар аймгийн Сүхбаатар сумын уугуул Дондогжавын унаган адуу юм. Өнгөрсөн жил шигшмэл морьдын “Их хурд-5” уралдаанд аман хүзүүдэж, Хотгойдын хурдад түрүүлсэн энэ хурдан буян өнөө жил АХ-ын түүхт 90 жилийн ойдоо амжилтаа бататган айргийн дөрөвт хурдалсан билээ.
9. Төв аймгийн Баян сумын уугуул “Агт-Эрдэнэ” галын уяач Х.Цогтсайханы Сүмбэн зээрд азарга. Сүмбэн зээрд нь Төв аймгийн Сэргэлэн сумын уугуул Гансүхийн сумынхаа 80 жилийн ойд түрүүлж байсан халзан азарганы төл бөгөөд өнгөрсөн жил төрийн их баяр наадамд түрүүлж, түмэн эх болсон бол давхар уяагаар шигшмэл морьдын “Их хурд-5” уралдаанд айргийн гурваар хурдалж өнөө жилийн АХ-ын 90 жилд аргагүй хурдан хүлэг болохоо дахин батлан харуулж айргийн тавд хурдалсан билээ.