"Тод магнай" сэтгүүлийн 42 дахь дугаар гарлаа

Морьтон монголчуудын мөнхийн омогшил “Тод магнай” сэтгүүлийнхээ 42 дахь дугаарыг уншигч танаа хаяглан илгээж байна. Монгол сайхан эх оронд маань дэлгэр зун айлчлан ирж, хүн малын нуруу тэнийж жарганхан сууна. Монгол төрийн наадам айсуй энэ л өдрүүдэд уяачид их ажилдаа хэдийнэ орчихсон, нойр хоолоо умартан хөдөө хотгүй л ажил ихтэй гүйлдэнэ. Гэсэн ч их ажлынхаа хажуугаар цаг гарган “Тод магнай” сэтгүүлийн хоймороо саатсан эзэд бол хурдны өлгий нутаг Сүхбаатар аймгийн хийморилог эрчүүд байлаа.
...Ургах наран зүгт нутаг минь байдаг юмаа
Уртын дуу шиг тал цэнхэртэж байдаг юм
Уудам талаа туулна гэж
Унаган хүлэг минь босоо төрдөг юмаа...  Үнэхээр л Сүхбаатар аймгийн унаган хүү, яруу найрагч С.Амартайваны “Наран мандах нутаг”-таа ийн шүлэглэсэнчлэн энэ нутгийн унага болгон нь босоо төрж, эр болгон нь хурд ирлэдэг юм. Тус аймгаас Монгол улсын Манлай уяач зургаа, Алдарт уяач  найман төрөн гарчээ. Тэр дундаа нэгэн жил Ч.Улаан, С.Төмөр-Очир, Ч.Гансүх нарын гурван  Манлай төрсөн нь онцлох үйл явдлын нэг болж байсан билээ. Энэ удаагийн дугаарын хүндэт зочноор Монгол улсын Манлай уяач Ц.Онгуу тухлан “Алаг даахай үүрлэбэл морь гарцаагүй айрагддаг” хэмээн сонирхолтой яриа өрнүүлсэн билээ. Түүнчлэн Монгол улсын Манлай уяач С.Төмөр-Очир, Ч.Улаан, Т.Монхор нарын цолтнуудаас эхлээд эдний хойч үе болсон удамт уяачид тун ч амттай ярилцлагуудыг өрнүүлсэн юм. Тус аймгийн сум бүр өөрийн бэсрэг угшилтай байх  агаад алдарт Дүйдэн панзын хар, Махбуриадын улаан, Ширээтийн цагаан, Хүүхэн Шүүлэнгийн хээр, Орлой хутагтын адууны “Цуутай хүлгэдийн аатай түүх” булангаасаа шимтэн уншина бизээ.
Энэ мэтчилэн уламжлалт “Урт чихт”, “Удам”, “Хүлгэд”, “Уяач” булангийн шинэ сонин бүхнийг танд үлдээе.
“Тод магнай” сэтгүүлийн маань дөрвөн жилийн түүхэн дэх 200 нүүртэй сэтгүүлийн хамгийн өнөр бүлийнхэн Өмнөговьчууд болж таарсан. Харин энэ удаад энэхүү рекордыг Сүхбаатарчууд эвдсэн юм. Эртнээсээ наашаа хурдан хурц хүлгэдээрээ алдартай энэ нутгийн адууны тухай сонин сайхан бүхнийг 400 нүүрнээ багтаана гэдэг үнэхээр амаргүй байлаа. Ингээд та бүхэн энэ цагийн морин уралдааны өнгийг тодорхойлж буй Сүхбаатарчууд халуун ам бүлээрээ цугларсан "Тод магнай"-н шинэхэн дугаараа "Интер" номын салбар дэлгүүрүүд болон сонин борлуулах цэгээс мөн редакцийн 9509-2992 дугаарын утсанд холбогдож аваарай.