Сүхбаатар аймгийн наадамд түрүүлж айрагдсан соёолон, дааганууд

А.Тэлмэн
2013 оны 7-р сарын 10 -нд
Хурдны өлгий Сүхбаатар аймгаас дараагийн мэдээ  ирлээ. Тоосонд нь ороход бүтэн жилийн хийморь сэргэдэг гэдэг соёолонгийн уралдаанд 155 хурдан буян шандас шалгаснаас Баруун-Урт  сумын уугуул аймгийн Алдарт уяач Цэрэндондовын хүрэн үрээ түрүүлж, түмэн эхээ дуудууллаа. Харин аман хүзүүнд Уулбаян сумын уугуул Баяжихын шарга, айргийн гуравт Эрдэнэцагаан сумын уугуул Сүхээгийн саарал, айргийн дөрөвт Баруун-Урт сумын уугуул  Р.Ганзоригийн саарал, айргийн тавд Эрдэнэцагаан сумын уугуул  Амгаланбаатарын Таван цагаан тус тус хурдалж, уясан эзэн унасан хүүхэд наадамчин олноо баясгажээ.
Харин дааганы уралдаанд 92 хүлэг тоосоо өргөснөөс түрүү, аман хүзүүнд “Жавхлант шарга” МСУХ-ны тэргүүн, сумын Алдарт уяач Паламын Мөнхжаргалын хоёр үрээ хурдалжээ. Тодруулбал түрүү магнай хээр даага хэдхэн хоногийн өмнө болсон сумынхаа наадамд түрүүлсэн бол аман хүзүүдсэн хонгор даага сумандаа дөрвөөр давхиад байсан юм. Хурдан дааганы уралдааны айргийн гуравт Баруун-Урт сумын уугуул Оюунсүрэнгийн халиун, айргийн дөрөвт Асгат сумын харьяат аймгийн Алдарт уяач Лутбаярын хүрэн, айргийн тавд Асгат сумын харьяат Сүрэнжавын хүрэн тус тус хурдалжээ. Дашрамд сонирхуулахад  хүрэн өмнө нь Асгат сумын наадамд таваар давхисан юм.
Мэдээллийг: “Жавхлант шарга” МСУХ-ны нарийн бичгийн дарга Ө.Хүдэрхангай

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна