Унаган зээрдийн удаах амжилт

Хурдан хүлгэдээ дэлхийд данслуулсан " Монгол морь-3000" уралдаанд түрүүлж айрагдсан ажнайгуудыг цувралаар танилцуулж буй. Энэ удаа айргийн дөрөвт хурдалсан Дундговь аймгийн Дэрэн сумын уугуул, аймгийн Алдарт уяач Ц. Бямбасүрэнгийн зээрд азарганы фото агшныг хүргэж байна. Өнгөрсөн жил төрийнхөө наадамд аман хүзүүнд хурдалж, өнөө жил айргийн гуравт давхисан энэ хурдан буян Ц.Бямбасүрэн уяачийн унаган адуу. Тодруулбал Ц.Бямбасүрэн уяачийн цавьдар азарганы төл юм.“Их хурд-3” уралдаанд аравт давхиж байсан цавьдар азарга, аймаг сумынхаа наадамд олонтаа  түрүүлж айрагдаж байсан хурдан буян бөгөөд Дэрэн сумын 80 жилийн ойд түрүүлэн зодог тайлж байсан  билээ.  Цавьдар азарганы дээд удам нь  Дундговь аймгийн Говь-Угтаал сумын уугуул МУ-ын Алдарт уяач Осоржавын Шаравжамцын алдарт Бөгөн хүрэн азаргатай угшил нэгтэй зээрд азарга байсан  гэдэг. Зээрд азаргыг Бямбасүрэн уяачийн аав Цэлхээ Алдарт  авч хурдны үр тарьсан нь ийнхүү хожмоо дэлгэрчээ.Унаган зээрдийн эх зээрд гүү нь морины байнд ирсэн хул  азарганы төл бөгөөд Бямбасүрэн уяачийнд олон хурд төрүүлсэн хэмээдэг. Монгол төрийн наадамд хоёронтоо цулбуур өргүүлсэн Унаган зээрдийн ах зээрд морь аймаг сумын наадамд хэд хэд түрүүлж айрагдсан хурдан буян бөгөөд нутаг орныхон нь анддаггүй юм билээ.

А.Мөнх