Максынхны бэсрэг наадам

Макс группийн хамт олон гадаадын түншүүдээ ирсэнтэй холбогдуулж 2013 оны 9 дүгээр сарын 21-ий өдөр Төв аймгийн нутаг дэвсгэрт нэгэн бэсрэг наадмыг зохион байгуулжээ. Энэ бэсрэг наадмын хүчит бөхийн барилдаанд 9 бөх бүртгүүлсэн бөгөөд манлайлан барилдсан 3 бөхөө гоц мөргүүлж залуучуудаа нугалж барилдуулсан байна. Булган аймгийн Хутаг-Өндөр сумын харьяат Макс группийн бөх аймгийн начин Б.Мөнхбат, Өвөрхангай аймгийн Нарийнтээл сумын харьяат сумын заан Заяахүүгийн Баттөмөр нараар манлайлуулсан бөхийн барилдаан цөөн бөх барилдсан хэдий ч сонирхолтой болсон байна.
Нэгийн даваа
1. Б.Мөнхбат а.н - гоцлов
2. З.Баттөмөр с.з – гоцлов
3. Б.Бямбадорж с.з – гоцлов
4. Ч.Эрдэнэбаяр с.з – Ц.Цогсүрэн з.б дунгуйлдаж татаад
5. Т.Адьяатөмөр с.з – Б.Пүрэвдорж з.б шуудагдаж татаад
6. Б.Лхагвадорж с.з – Н.Загарзүсэм с.з хонгодоод түрж хөөхөд зайлаад
Хоёрын даваа
1. Б.Мөнхбат а.н – Б.Лхагвадорж с.з түрж хөөхөд дагуулж хөмрөөд
2. З.Баттөмөр с.з – Т.Адьяатөмөр шуудагдаж мөргөж түрээд
3. Б.Бямбадорж с.з – Ч.Эрдэнэбаяр хонгодоод
Хоёр давсан 3 бөхийг тойргоор барилдуулахад: З.Баттөмөр улсын шонхор, сумын заан Б.Лхагвадоржийг таллаж татаад давсан бол Б.Лхагвадоржийн ах сумын заан Б.Бямбадоржийг талласан боловч дутуудаж өвдөг шороодсон байна. Ах дүү хоёрын барилдаанд ах нь давснаар энэ барилдааны түрүү бөхөөр тодорчээ. Ийнхүү цөөн бөх барилдсан хэдий ч “цөөнгүй” цолтонтой энэ бэсрэг наадам сайхан болж өндөрлөсөн байна.
Зургийн тайлбар.
Арын эгнээний зүүн гар талаас: Сумын заан А.Заяахүү агсны хүү сумын заан Баттөмөр, сумын заан Чулуунбатын Эрдэнэбаяр /2012 онд Төв аймгийн Аргалант суманд түрүүлсэн, жүдогийн ОУХМ Д.Төмөрхүлэгийн үеэл ах/, “Макс” группийн бөх улсын начин Батмөнхийн Сангисүрэн, “Макс” группийн ерөнхийлөгч, Монгол Улсын тод манлай уяач Дагвадоржийн Ганбаатар, Дагвадоржийн Цэрэнжигмэд, сумын заан Тогообатын Адьяатөмөр /Сумын заан Ц.Содномринчингийн ач, 2012 онд Нарийнтээл сумандаа түрүүлсэн/, сумын заан Батжаргалын Бямбадорж /2010 онд Нарийнтээл сумандаа үзүүрлэж, Тарагт суманд түрүүлсэн, улсын шонхор Б.Лхагвадорж, залуу бөх Б.Пүрэвдорж нарын ах/
Урд эгнээнд зүүн гар талаас: Сумын заан Найгалсүрэнгийн Загарзүсэм /2013 онд Нарийнтээл сумандаа түрүүлсэн, сумын заан Н.Загархоролын дүү/, залуу бөх Цогийн Цогсүрэн, залуу бөх Батжаргалын Пүрэвдорж /сумын заан Б.Бямбадоржийн дүү, улсын шонхор Б.Лхагвадоржийн ах/, “Макс” группийн бөх, улсын хошой шонхор, сумын заан Батжаргалын Лхагвадорж / Улсын баяр наадмын өсвөр бөхийнбарилдаанд 2012, 2013 онд дараалан түрүүлсэн, Дундговь аймгийн Дэрэн суманд 2012 онд түрүүлсэн, сумын заан Б.Бямбадорж, залуу бөх Б.Пүрэвдорж нарын дүү/

МУИС-ийн оюутан Т.Түмэндэмбэрэл