“Сүхийн тэнхэм”-ийн 90 жилийн ойд зориулан хурдан дааганы уралдаан боллоо

Монгол улсад шинэ үеийн боловсролын байгууллага сургууль үүсэн байгуулагдсан түүхэн он жилүүдийн эхлэл, Монгол улсын анхны 13 бага сургуулийн нэг Халхын Засагт хан аймгийн Ахай бэйлийн хошууны Сүхийн Тэнхэмээс улбаатай  Хөвсгөл аймгийн Мөрөн сумын Дэлгэрмөрөн цогцолбор сургууль байгуулагдсаны түүхт 90 жилийн ойн баярын арга хэмжээний хүрээнд“Ирээдүйн Түмэн Эх” хурдан дааганы уралдааныг 2013 оны 10 сарын 03 нд Мөрөн суманд зохион байгууллаа.  Ой зохион байгуулах комисс "Дэлтэй Цэнхэр" МСУХ-той хамтран зохион байгуулсан уг уралдааныг аймгийн ИТХ-ын тэргүүлэгчдийн 2013 оны 04 сарын 18 ны өдрийн 25 дугаар тогтоолоор “аймгийн бүс”-ийн зэрэглэлтэйгээр зохион байгуулагдахаар товлогдсон бөгөөд Цагаан-Уул, Мөрөн, Тариалан, Их-Уул, Арбулаг, Бүрэнтогтох, Төмөрбулаг, Рашаант , Тосонцэнгэл зэрэг сумдын уяачид өргөнөөр оролцож нийт 64 хурдан Ирээдүйн Түмэн эхүүд хурд шандсаа 12 км-ийн зайд сорин уралдлаа.
Ирээдүйн Түмэн Эх хурдан дааганы уралдааны бай мөрийг Дэлгэрмөрөн цогцолбор сургуулийн 1983 онд төгсөгчид буюу УИХ-ын гишүүн, Дэлтэй Цэнхэр МСУХ ны тэргүүн Ц.Даваасүрэн, Аймгийн иргэдийн төлөөлөгчдийн хурлын дарга, тус холбооны нарийн бичгийн дарга Т.Болдбаатар нар  ивээн тэтгэхийн зэрэгцээ эхний 30 байранд хурдалсан даагануудыг “Тодмагнай” сэтгүүлийн Хөвсгөл аймгийн тусгай дугаараар байлсан нь уяач, унаач хүүхдүүдэд сонин сайхан бэлэг боллоо.
Ингээд Ирээдүйн Түмэн эхүүдийн амжилтын цувааг жагсаавал:
1.Хөвсгөл аймгийн Шинэ-Идэр сумын уугуул, аймгийн Алдарт уяач Цэрэнбатын Чимидбавуугийн хар даага түрүүлэн наадамчин олноо баясгалаа. Хар даага АХ-ын 92 жилийн ой, Хөвсгөл аймгийн  баяр наадамд айрагдан, Булган аймгийн Сайхан суманд зохиогдсон МУ-ын харцага  Найдангийн Түвшинбаярын мялаалга наадамд түрүүлж байсан бөгөөд ийнхүү дэлтэй цэнхэрийн отгон уралдаанд түрүүлэн ирээдүйн түмэн эхээр цоллууллаа.
2.Хөвсгөл аймгийн Тариалан сумын харьяат, аймгийн Алдарт уяач Бадрахын Ганбаярын “Дөрвөн цагаан” даага хурдаллаа. “Дөрвөн цагаан” даага Тарилан сумын уугуул, аймгийн Алдарт уяач Дондовын Бадрахын буурал азарганы төл юм. 2013 оны 06 сарын 01 ний “Дэлтэй цэнхэр”-ийн шилдэг хүлэг шалгаруулах уралдаанд айргийн дөрөвт, АХ-ын 92 жилийн ойн улсын их баяр наадам, Хүй долоон худагт тоосоо өргөж 13 аар давхиад дараахан нь Булган аймгийн баруун бүсийн уралдаан Сайхан сумын Эрээний уурхайн 10 жилийн ойд айргийн дөрвөөр хурдалж, ирээдүйн түмэн эхэд аман хүзүүдсэн амжилтаар дааган насныхаа уралдааныг өндөрлөлөө.
3.Хөвсгөл аймгийн Тариалан сумын харьяат уяач Б.Батцогтын “Суман буурал”. Буурал даага Дорнод аймгийн Сэргэлэн сумын угшилтай адуу бөгөөд 06 сарын 01-ны  шилдэг хүлэг шалгаруулах уралдаанд түрүүлэн Дэлтэй цэнхэрийн шилдэг хүлгээр тодорч, Ардын хувьсгалын ойн баяр наадамд сумандаа мөн тод магнайлж, Архангай аймаг байгуулагдсаны 90 жилийн ой, хангайн бүсийн хурдан морины уралдаанд айргийн таваар давхисан энэ цагийн эрхэм хурдны нэг юм.
4.Хөвсгөл аймгийн Мөрөн сумын харьяат Криловын Ганбаатарын хүрэн халзан даага айргийн дөрөвт хурдаллаа.Халзан даага Сүхбаатар аймгийн Мөнххаан сумын угшилтай.
5.  Хөвсгөл аймгийн Цагаан-Уул сумын уяач Д.Мөнх-Эрдэнийн халзан даага. Халзан даага 06-р сан 1-ны шилдэг хүлэг шалгаруулах уралдаанд арайхан айрагдаж чадаагүй зургаад хурдалж байсан бөгөөд Завхан аймгийн Тосонцэнгэл сум  байгуулагдсаны 80 жилийн ойд аман хүзүүдэж байсан  юм.
6.Хөвсгөл аймгийн Их-Уул сумын уугуул, Улсын Их хурлын гишүүн Л.Энх-Амгалангийн хонгор.Хонгор дааганы уяа сойлгыг аймгийн Алдарт уяач Б.Ганзориг тааруулжээ.
7.Цагаан-Уул сумын уяач Б.Алтаншагайн хар
8.Бүрэнтогтох сумын уяач Ванчинбазарын Ганзоригийн хүрэн
9.Хөвсгөл аймгийн Их-Уул сумын харьяат Нанжидсүрэнгийн хүрэн
10.Булган аймгийн Хутаг-Өндөр сумын харьяат, аймгийн Алдарт уяач Гэрэлт-Одын хонгор
11.Мөрөн сумын харьяат "Лидер Кашмир" ХХК-ийн  Л.Ганболдын хар. Хар дааганы уяа сойлгыг Мөрөн сумын харьяат залуу уяач “жаахан” хэмээх Баяраа тааруулжээ
12.Цагаан-Уул сумын харьяат  Б.Алтаншагайн хүрэн
13.Цагаан-Уул сумын харьяат Т.Эрдэнэбатын хээр
14.Мөрөн сумын уугуул, аймгийн Алдарт уяач Б.Баясгалангийн хээр
15.Мөрөн сумын харьяат  К.Ганбаатарын шарга  тус тус хурдалжээ.
Дэлгэрмөрөн Цогцолбор сургуулийн ТНУ-ны багш, “Дэлтэй Цэнхэр” МСУХ-ны ажлын албаны ажилтан Т.Наранхүү