"Нутгаа дуурсгана" барилдаан-аймгийн цолтнууд

АЙМГИЙН ЦОЛТОН
I тойрог
Эхний тойргийн анхны барилдаан Увс, Булган аймгийн хооронд болж 8:8-аар тэнцэв. Увсаас аймгийн хурц арслан О.Гантулга уналгүй дөрөв давсан бол Булганаас Дармаагийн Тамир арслан гурван даваа авлаа.
Дараагийн барилдаан Ховд, Сүхбаатар аймгуудын барилдаан байв. Эхний хоёр тойрогт Сүхбаатарын хүчтэнүүд 8 даваа авч илт давамгайлсан бол дараагийн хоёр тойрогт нэмж 4 даваа авснаар эхний ялалтаа авлаа. Сүхбаатараас Мухаалайн Баасанбат хэмээх шинэхэн заан энэ тойрогт унасангүй ээ.
Эхний тойргийн дараагийн барилдаан Баянхонгор, Говь-Алтай аймгийн барилдаан байсан бөгөөд Хонгор нутгийнхан 13:3-аар яллаа. Нацагсүрэнгийн Золбоо, Болдын Эрдэнэхүү нар Алтайнханд даваа өгсөнгүй.
II тойрог
Хоёрдугаар тойргийн эхний барилдаан Булган Говь-Алтай аймгийн хооронд болж Булганыхан 12:4-өөр яллаа. Д.Тамир урд тойргийн адил сайн барилдаж дөрвөн даваа авсан бол Говь-Алтайн Баарангийн Отгонбаатар, Булганы Д.Амаржаргал нар 3, 3 давлаа.
Дараагийн барилдаанд Баянхонгор, Ховд аймгууд учраа таарч 12:4-өөр Баянхонгор ялав. Н.Золбоо, Давж. Батбаяр нар Ховдын залууст даваа өгсөнгүй.
Хоёрдугаар тойргийн гурав дахь тулаан Увс, Сүхбаатар аймгийн хооронд болж Сүхбаатар 10:6-аар яллаа. Болдбаатарын Батжаргал, Болор-Эрдэнийн Номиндалай, Мухаалайн Баасанбат нар гурав, гурван даваа авч багийнхаа ялалтыг авчрав.
III тойрог
Эхний барилдаан Говь-Алтай Ховд аймгийн хооронд болов. Алтайн бөхчүүдээс а.а Ж.Алтаншагай, Д.Тангад нар сайн барилдсан бол Ховдоос а.н Г.Ууганбаяр, с.з Б.Сосорбарам нар сайн барилдаж байлаа.
Гуравдугаар тойргийн хоёр дахь барилдаан Булган, Сүхбаатар аймгийн хооронд болж Алтангэрэлийн Отгонбаатар, Дармаагийн Тамир нар гурав, Дашзэвэгийн Амаржаргал, Дэлгэрсайханы Амарсайхан нар хоёр давснаар Булган аймгийнхан яллаа.
Гуравдугаар тойргийн гурав дахь барилдаанд Баянхонгор, Увс аймгууд барилдаж Хонгорын залуус 11:5-аар ялав. Нацагсүрэнгийн Золбоо дөрөв барилдаж дөрөв давсан бол Увсаас Цэдэндоржийн Мөнхбаяр тун сайн барилдаж байлаа.
IV тойрог
Сүүлийн тойргийн эхний барилдаанд Увс, Говь-Алтай аймгийд учраа таарсан бөгөөд а.з Л.Цээсүрэн дөрвөн даваа авч О.Гантулга, Д.Тогтохжаргал, Ц.Мөнхбаяр нар гурав, гурван даваа авснаар Увсынхан 13:3-аар яллаа. Алтайгаас гарьд Ж.Бат-Эрдэнийн ах а.н Ж.Баянмөнх шаггүй бөх гэдгээ харуулж хоёр даваа авсан юм.
Дөрөвдүгээр тойргийн хоёр дахь барилдаанд Булган, Ховд аймгууд барилдаж, Булганыхан 14:2-оор ялав. А.Отгонбаатар, Д.Тамир нар өрсөлдөгчдөдөө даваа өгсөнгүй.
Дөрөвдүгээр тойргийн гурав дахь барилдаанд манлайлан барилдаж буй хоёр дэвжээ учраа таарч 9:7-оор Баянхонгорынхон ялснаар тэргүүн дэвжээ болох нь тодорхой боллоо. Нацагсүрэнгийн Золбоо бэлтгэл жигдэрч сайхан болсноо илтгэж хоёр өдрийн турш 16 барилдаж 16 давсан сайхан амжилт үзүүлсэн бөгөөд багаа ялахад түүний нөлөө тун их байсан нь лавтай.
Ийнхүү морин жилийн тэргүүн дэвжээ шалгаруулах нутгаа дуурсгана барилдааны аймгийн цолтны ангилалд а.а Н.Золбоо ахлагчтай, улсын харцага Д.Батболд дасгалжуулагчтай Баянхонгор аймгийн Их Богд дэвжээ 13 оноо, 53 даваатайгаар тэргүүн байрт шалгарч 3 сая төгрөг гардлаа.
Аймгийн арслан А.Отгонбаатар ахлагчтай, улсын заан М.Өсөхбаяр дасгалжуулагчтай Булган аймгийн Булганхангай дэвжээ 11 оноо, 52 даваатайгаар дэд байрт шалгарч 2 сая төгрөгийн эзэд боллоо.
Гутгаар байрт аймгийн хурц арслан Ш.Мөнгөнбаатар ахлагчтай, аймгийн хурц арслан Б.Батжаргал дасгалжуулагчтай Сүхбаатар аймгийн Жавхлант дэвжээ 9 оноо, 44 даваа авснаар шалгарч 1,5 сая төгрөг хүртлээ.
Удаах байруудад 4 оноо, 37 даваа авсан аймгийн хурц арслан О.Гантулга ахлагчтай, сумын заан Б.Энхболд дасгалжуулагчтай Увс аймгийн Увс нуур дэвжээ, 3 оноо, 28 даваатай, аймгийн начин Г.Ууганбаяр ахлагчтай, улсын заан Ц.Мягмарсүрэн дасгалжуулагчтай Ховд аймгийн Ховд дэвжээ, 3 оноо, 26 даваатай, аймгийн арслан Б.Отгонбаатар ахлагчтай, улсын начин Д.Бадрах дасгалжуулагчтай Говь-Алтай аймгийн Хантайшир дэвжээд шалгарч 1 сая, 0,8 сая, 0,6 сая төгрөгийн шагнал хүртлээ.
Т.Түмэндэмбэрэл