Унаач Д.Отгондалай: Олимпийн Аваргын бэлэглэсэн шатрыг тоглоод алтан медаль авсан

Хөвсгөл аймгийн унаач Д.Отгондалай хүүгийн яриаг уншигч танаа хүргэж байна.
-Отгондалай дүү маань хэдэн настай билээ?
-Би 11 настай.
-Хэдэн настайгаа хурдан морь унаж байна. Ямар ямар амжилттай наадаж байна вэ?
-Хурдан морь унаад хоёр жил л болж байна. Анх Нямбаатар ахынхаа морийг унаж Сангийн далайн наадамд аман хүзүүнд хурдлуулж байлаа. Дараа нь Сүүжийн овоонд очиж, хээр морио дөрөвлүүлж, Булган аймагт болсон Олимпийн Аварга Түвшинбаярын нэрэмжит наадамд их насны гүзээ хээр морио аман хүзүүдүүлсэн. Би чинь Булган  нутгийг үзээд ирсэн. Аваргын нутаг гоё л юм билээ. 
-Өөр хаана хаана очиж наадаж байв?
-Аймгийн баяр наадмын соёолон насанд халтар соёолонгоо гуравлуулж, хул морио еслүүлсэн.
-Хоёр жил морь унаж байгаа гэхэд мундаг байна шүү. Морь унаад  авсан хамгийн гоё бэлгийг хаанаас авч байсан бэ?
-Аль ч наадам морь айрагдуулахаар цүнхтэй хичээлийн хэрэгсэл ихэвчлэн өгдөг. Харин Түвшинбаяр Аваргын наадмын бэлэг хамгийн гоё нь байсаан. Бэлгэнд нь шатар, даам байсан.  Би бэлэгний шатраа тоглож, тэмцээнд оролцоод алтан медаль авсан. Гараагаа  сайн эхэлсэн болохоор дараа дараагийн удаад олон шатрын тэмцээнд орж хүч үзнэ гэж бодож байгаа.
-Морь унаад цалин авч байна уу?
-Авна ш дээ. Гэхдээ надад томчууд шиг мөнгөний хэрэгцээ байнга гараад байхгүй болохоор тоолж ч  бараг үзээгүй дээ. Нямбаатар, Болдбаатар ах нарынхаа уясан морьдыг айраг түрүүнд хурдлуулах нь миний ажил байгаа юм. Ажилаа сайн хийнэ гэж боддог шүү.
-Чамд зүсэлсэн морь бий юу?
-Одоохондоо үгүй ээ. Гэхдээ Нямбаа ах надад морь өгнө гэсээн.
-Том болоод ямар мэргэжилтэй хүн болно гэж боддог вэ?
-Сайн эдийн засагч болно гэж боддог. Энэ чиглэлээрээ суралцаж төгсөөд нутагтаа ирж банкинд ажиллана даа.
-Тийм ээ, сайн эдийн засагч болоорой. Дүүдээ амжилт хүсье.

"Тод магнай" сэтгүүл №45