Аймгийн Алдарт уяач Д.Эрдэнэбулган: Тэнүүн хонгор маань энэ жил хоёр түрүүлж, нэг айрагдлаа

АХ-94 жилийн улсын их баяр наадамд Тэнүүн хонгор шүдлэнгээ түрүүлгэсэн Дундговь аймгийн Өлзийт сумын уугуул, аймгийн Алдарт уяач Д.Эрдэнэбулганы баярын сэтгэгдлийг уншигч танаа хүргэж байна.

-АХ-94 жилийн ой, төрийнхөө их баяр цэнгэлд Тэнүүн хонгор үрээгээ түрүүлгэсэн танд баяр хүргэе.
-Баярлалаа. Баяр наадам сайхан боллоо. Төрийн наадамд зургаан адуутай очиж, хонгор үрээгээ түрүүлгэлээ. Тэнүүн хонгор маань улсын баярын дараа Өмнөговь аймагт болсон “Говь шанхын хурд-5” говийн бүсийн уралдаанд мөн түрүүлсэн шүү дээ. Говийн бүсэд миний уясан шүдлэн үрээ мөн аман хүзүүдсэн.
-Одтой сайхан нааджээ?
- Говьсүмбэр аймгийн Баянталд болсон Засгийн газрын тогтоолт наадамд Тэнүүн хонгор маань гурваар давхиж, хонгор шүдлэн маань дөрөвлөн, манай дүү Эрболдын уядаг хул морь аман хүзүүдсэн шүү дээ. Хавар “Дүнжингарав”-аас эхлээд энэ жилийн хувьд улс, бүсийн наадмаас найман айраг, түрүү авлаа. Хонь жил хачин сайхан ээлтэй жил байлаа.
-Улсын наадамд шүдлэн түрүүлсэн. Бусад нас яаж давхисан бэ?
-Бусад нь тархины хэдтэй ойрхон явж байгаад жаахан унжиж, модтой давхицгаасан. Соёолон есөөр давхисан юм байна.
-Ингэхэд Тэргүүн хонгор дуулдсангүй. Уралдсан уу?
-Энэ жил өнжсөөн.
-Даншиг цагааны тухайд?
-Байгаа байгаа. Цагаан азарга маань шүдлэндээ Өмнөговь аймгийн 80 жилийн ой, “Говь шанхын хурд-4” говийн бүсийн уралдаанд тус тус айрагдаж байсан. Дараа жил нь 2012 онд “Их мандал-2012” говийн бүсийн уралдаандаа түрүүлж, Өвөрхангайн Есөнзүйлд болсон Өндөр Гэгээн Занабазарын Бат оршил өргөх даншиг наадамд таваар давхисан хурдан хүлэг.
-Аав хүү уяачид сүүлийн жилүүдэд одтой сайхан наадаж байгааг морь сонирхогчид андахгүй ээ.
-“Тэнүүн говийн хурд” гал маань сүүлийн жилүүдэд  сайхан наадаж байгаа. Өнгөрсөн жил 106 айраг түрүү авсан бол, өнөө жил  120,130-аад айраг түрүү авсан байна лээ.
-Галын гишүүдээ танилцуулаач?
-“Шинэ дэлхий холдинг” ХХК-ийн захирал Л.Алтанхуяг, “Мөнх хайрхан” ХХК-ийн захирал А.Мөнхбаяр болон Чулууны Ганцогт, Оёогийн Мөнхбат, Чимэддорж, яруу найрагч Баянмөнх, дуучин Төрмандах, Цолмонбаяр нарын залуус бий.
-“Тэнүүн говийн хурд”-ынхандаа  амжилт хүсье. Ярилцсанд баярлалаа.

А.Энхжил