Б.Мөнхбаяр: Хүй долоон худагийн дэнжид Увсын нэрийг гаргасан хурдан хүлгүүд олон байгаасай гэж хүсдэг

Увс аймгийн Улаангом сумын уугуул, “Увсын хурд” МСУХ-ны дэд тэргүүн Б.Мөнхбаяртай хийсэн ярилцлагыг уншигч танаа хүргэж байна.
-Хэзээнээс холбооны тэргүүнээр ажиллаж байгаа вэ?
-Холбооны тэргүүний ажлыг аваад жил гаруй болж байна. Тухайн үеийн холбооны тэргүүлэгч  Сүхээлээ ахад аймгийн уяачдын холбоонд тэргүүлэгч болмоор байгаа санаагаа хэлсэн юм. Ингээд холбооны хурлаар ярилцаад дэд тэргүүн болсон.  Увс аймгийн уяачид ганцхан Увсдаа наадаад байх биш төвийн бүс, Улаанбаатарт очиж наадаасай гэж боддог. Энэ хүслээ ажил болгох боломжтой санагдаад ийнхүү саналаараа сонгогдсон юм. Бид Тэсийн гол, баруун Монголын адуугаар улсын өндөр довон дээр уралдуулж Увс нутгийнхаа нэрийг гаргамаар байна. Үүний тулд уяачдаа чиглүүлэн, хүсэл, зорилготой болгосноор ямар нэгэн амжилт гаргах үүд хаалга нээгдэх болов уу гэж бодож явдаг юмаа.
-Үүнийгээ хэрэгжүүлэхийн тулд ямар ямар ажлыг хийж байна вэ?
-Энэ он гарсаар тавдугаар сарын 2-нд Төвийн бүсийн хурдыг зохион байгууллаа. Зургаан насны морь уралдсан энэ наадам ямар ч будлиангүй, амжилттай сайхан боллоо. Удахгүй манай Увсын даншиг болох гэж байна. Энд зориулж 120 метр, шинэ гарааны төхөөрөмж авснаа саяны төвийн бүсийн хурдаар туршсан юм. Адуу малаа сайжруулах ажлыг эхлүүлээд Төв аймгаас ганц хоёр азарган үрээ авлаа. Эхний төл нь ирэх жилээс гарна.  Наадмынхаа өмнө ганц хоёр үрээ нэмээд авчих санаатай Улаанбаатарт ирчихээд байгаа нь энэ юм. Бас Хэнтий, Сүхбаатар, Төв аймгуудаас гүү авч, Тэсийн голын унаган азарганд тавихаар зорилго тавьсан. Саяхан Монгол улсын Манлай уяач Батбилэгтэй нутагтаа очсон. Ажил ихтэй ирсэн болохоор манай адуу байдаг тэр хавийнхантай нэг оройг ярьж хөөрөөд өнгөрөөсөн. Бас Тэсд Цээпил ахын залуучуудтай уулзууллаа. Эндээс уяачдаа хөгжүүлээд, дараа нь адуугаа сайжруулснаар амжилт бидэнд харагдах юм болов уу гэж бодогдсон. Энэ мэтээр уяачдыг аваачиж, Увсынхаа уяачидтай зөвлөгөөн хийвэл зүгээр санагдсан. 
-Таны хувьд моринд орох шалтгаан юу байв?
-Зуны амралтаараа хөдөө очиж амардаг байсан. Энэ жилүүдэд л хурдан морь гэдэг ямар гоё юм бэ гэдгийг мэдэрч эхэлсэн. Түүнээс хойш морь уях хүсэлд хөтлөгдсөөр, 2012 оноос өөрөө морь уралдуулж эхэлсэн.  Анх Тэсийн Амартөр гээд авгын талын ахаасаа Начин халтрын төрсөн дүү шүдлэн үрээ авсан юм. Авсан жилээ тамиргүй байсан болохоор уяагүй. Харин дараа жилээс нь уяад уралдуулж байна.
-Анхны айраг түрүүгээ хэдэн онд, ямар наадмаас авч байсан бэ?
-Анхны айраг түрүүгээ жижиг баяруудаас л авсан даа.Сөнгө даагаар нэг жил 10 уралдаж найм орж намайг баярлуулсан. Миний хэдэн адуу мал найз дээр минь байдаг юм. Ярилцлагын энэ дашрамд найздаа баярлаж явдаг шүү гэдгээ хэлээд авъя.
-Аймгийн статустай наадмаас хичнээн айраг, түрүүтэй вэ?
-Энэ он гарсаар нэг түрүү, нэг айраг авлаа. Урд жилд нь төвийн бүсийн хурдаар 1түрүү, 1айраг авсан юм.
-Удахгүй баруун бүсийн наадам болно. Хэдэн насны морь уяж, уралдуулахаар төлөвлөж байна вэ?
-Би нас насанд л мордуулна гэж бодож байна. Хязаалан, соёолонгоо тэжээлд оруулсан, одоо бэлэн байгаа. Харин нэг даага, нэг шүдлэн наадмаас өмнө авах санаатай.
-Бидний яриа энд хүрээд өндөрлөж байна. Сүүлийн асуултыг танд үлдээж байна?
-Баяраллаа. Нутгийн ард түмэндээ Увс аймаг үүсэн байгуулагдасны 90 жилийн ойн баярын мэнд хүргье. Та бүхэн сайхан наадаарай.  
"Тод магнай" сэтгүүл Увс аймгийн тусгай дугаар