Д.Энхмандах: Уралдааны үед эмнэлгийн анхан шатны тусламж үйлчилгээ үзүүлэхэд шаардлагатай бүхий л төхөөрөмжөөр тоноглогдсон машин дагадаг

"Говьшанх-5" наадмын үеэр эмнэлгийн тусламж үйлчилгээний талаар Өмнөговь аймгийн бүсийн оношилгоо, эмчилгээний төвийн захирал Д.Энхмандахаас асууж торууллаа.

-“Говьшанхын хурд-5” говийн бүсийн уралдааны  үеэр хичнээн хүний бүрэлдэхүүнтэй баг ажилласан бэ?Ямар нэг хүндрэл бэрхшээл гарсан уу?
-Өмнөговь аймагт болсон Засгийн газрын тогтоолт говийн бүсийн уралдааны үеэр манай бүсийн оношилгоо, эмчилгээний төвөөс тусгай баг бүрдүүлж ажилласан. Өөрөөр хэлбэл захирал миний бие, түргэн тусламжийн хоёр жолооч, нэг сувилагч, нэг их эмч гэсэн бүрэлдэхүүнтэйгээр говийн бүсийн уралдааны үеэр ажиллалаа. Бидний хувьд энэ удаагийн уралдааны бас нэгэн онцлог бол морины бариан дээрээ нэг машин, нэг сувилагчийг тогтмол байлгаж, шаардлагатай үед тусламж үйлчилгээ үзүүлэхэд бэлэн байлаа. Үүнээс өмнөх уралдаануудын үед зөвхөн нэг  эмнэлгийн машин  үйлчилгээнд гардаг байсан бөгөөд яаралтай тусламж үзүүлэх шаардлага давхардсан үед бага зэргийн хүндрэл учирдаг байсан л даа. Тэр бүхнээс урьдчилан сэргийлж энэ удаагийн уралдааны үеэр хоёр машин гаргасан.
- Хүүхэд зэрэг мориноос унасан тохиолдолд хүндрэлтэй байсан гэж үү?
-Яг тийм. Нэг хүүхэд мориноос унаад түүнд анхан шатны тусламж үйлчилгээ үзүүлж байтал өөр нэг газар дахиад эмчийн тусламж хэрэгтэй болдог. Энэ тохиолдолд эхний хүүхдээ эмнэлэгт хүргэх, дараагийн хүүхдэдээ яаралтай тусламж үзүүлэх гээд бэрхшээл тулгардаг л даа. Энэ бүхнээс сэргийлж говийн бүсийн уралдаанаас эхлээд хоёр машин үйлчилгээнд гаргаж байгаа.
-Анхан шатны тусламж үйлчилгээ цогцоор нь үзүүлэх тусгай тоноглогдсон машинтай дуулдсан. Тэр талаараа дэлгэрүүлээч?
-Эмнэлгийн анхан шатны тусламж үйлчилгээ үзүүлэхэд шаардлагатай бүхий л тоног төхөөрөмж суурилагдсан тусгай машин гэж ойлгож болно. Өөрөөр хэлбэл бага зэргийн мэс ажилбар, боолт зэргийг хийхээс эхлээд бүхий л төрлийн анхан шатны тусламжийг үзүүлэх боломжтой. Өөрөөсөө 220 вольтын хүчин чадал бүхий цахилгааныг гаргадаг.
-Энэ удаагийн уралдаанд нэлээд ач холбогдол өгчээ дээ?
-Тэгсээн, энэ удаагийн говийн бүсийн уралдааныг “Ажнай” корпорацци болон Өмнөговь аймгийн Засаг даргын тамгын газар хамтран зохион байгуулсан гэдгийг та бүхэн мэдсэн байх. Аймгийн баяр наадамтай давхцсан учраас бид нэлээд өндөр ач холбогдол өгч, аймгийнхаа хүүхэд, гэр бүлийн хөгжлийн хэлтэстэй хамтран уралдаанч хүүхдийн аюулгүй байдлыг хангах, урьдчилан сэргийлэх тал дээр хамтран ажилласан.
-Хамгаалалтын хувцас хэрэгсэлд хяналт тавьсан гэсэн үг үү?
-Тиймээ. Хүүхэд унасны дараа бус унахаас нь өмнө урьдчилан сэргийлэхэд анхаарал хандуулж, хамгаалалтын хувцас хэрэгслийн бүрэн эсэхэд хяналт тавихын зэрэгцээ  шаардлагатай тохиолдолд  уралдааны замд гарахаас өмнө үзлэг хийсэн. Ер нь сүүлийн хэдэн жил манай аймагт зохион байгуулагдсан уралдааны үеэр хүүхэд унаж гэмтсэн, цаашлаад амь нас нь эрсэдсэн асуудал гараагүй.
-Энэ удаагийн уралдааны үеэр хүүхэд мориноос унасан уу?
-Нэг хүүхэд гараан дээр унаж эмнэлгийн тусламж авсан. Гэхдээ ямар нэг бэртэл гэмтэл аваагүй.
-Аймгийн ЗДТГ-аас та бүхний үйл ажиллагааг хэрхэн дэмждэг вэ?
-Дэмжилгүй яахав. Уралдааны үеэр аймгийн ЗДТГ, аймгийн МСУХ биднийг дэмжиж машин тэрэгний шатахуун хийгээд ажиллаж буй хүмүүсийг хоол ундаар хангадаг. Түүнчлэн аймаг орон нутгийн удирдлагууд иргэдийнхээ эрүүл мэндэд анхаарал хандуулж,  орон нутгийн төсвийн хөрөнгөөр хамгийн сүүлийн үеийн ЭХО аппарат, компьютер томографи, гемодиализийн аппаратыг авсан. Үүний үр дүнд өнгөрсөн жилийн мөн үеийнхтэй харьцуулахад нийслэлийг зорьж эмнэлгийн тусламж үйлчилгээ авдаг иргэдийн тоо 43 хувиар буурсан байна лээ.
-Бараг тал хувиар буурчээ?
-Өмнө нь сонсголын аппарат тааруулах, тархины бичлэг, томографи хийлгэх, дурангийн мэс ажилбар хийлгэх зэрэгт хот явдаг байсан бол одоо бүгд орон нутагтаа хийгддэг болсон.
-Чихэнд чимэгтэй сайхан мэдээ байна.Ард иргэдийнхээ эрүүл мэндийг сахин хамгаалх үйлсэд тань амжилт хүсье. Ярилцсанд баярлалаа.
"Говьшанхын хурд сэтгүүл №01