Уралдаанч Г.Цэцэнбилгүүн: Нэг жил морь унаад зургаан түрүү хүртсэн

-Хурдан морь унаад хэдэн жил болж байгаа вэ?
-Удаагүй ээ. Морь унаж сураад нэг жил болж байна. Цагаанчулуут, Цагаанхайрхан, Яруу, Эрдэнэхайрхан суманд очиж уралдаж, зургаан түрүү авсан. Лам нарын баярт өөрийнхөө халзан даагыг унаж түрүүлгээд, Эрдэнэхайрханд буурал морио түрүүлгэж, хүрэн үрээ гуравлуулсан. Харин Цагаанчулуутад арай айрагдуулж чадаагүй. Яруугийн наадамд улаан үрээ, халзан даага унаж дөрөвт давхисан. Богдын голд бор хонгор морио унаж түрүүлгэсэн ч зарчихсан.
-Аймгийнхаа наадамд очиж үзсэн үү?
-Үгүй, яваандаа үзэх байхаа.
-Хэддүгээр ангид сурдаг вэ. Морь унаад хичээл тасалдаг юм биш биз?
-Энэ жил би найман настай. Нэгдүгээр 10 жилийн хоёрдугаар ангиа онц дүнтэй төгссөн. Морь унаад хичээлээ хоёр удаа л тасалсан. Гэхдээ Бямбасүрэн багш загнаагүй. Манай ангиас Нямсамбуу бид хоёр морь унадаг.Тэгээд бид хоёр хичээлийн завсарлагаанаар яаж уралдсан тухайгаа ярьдаг юм. Тийм морь илүү хурдан морь байгаа гэхээр нь “тэр морь чинь амжихгүй шүү” гэчихдэг юм. /инээв/
-Морь унахдаа айдаг уу. Хүмүүс чамд юу гэж захидаг вэ?
-Ээж эмээл дээрээ босч яваарай, болгоомжтой байгаарай гэдэг. Аав болохоор морио сайн унаарай, тэгж уралдаарай гэдэг юм. Би хэлсэн ёсоор нь уруу газар амыг нь татаад, өсгүүр газар морио амрааж, барианд ойртохоор шахдаг. Ер нь морь унах гоё ш дээ. Би л лав дуртай. Морь унахдаа айдаггүй. Ах маань ч гэсэн морь унадаг байгаад одоо том болоод хасагдчихсан.
"Тод магнай" сэтгүүл Завхан аймгийн тусгай дугаар, 2014 он