Хангайн бүсийн уралдааны сонгомол ангилалд түрүүлж, айрагдсан хүлгүүд

Архангай аймаг үүсч байгуулагдсаны түүхт жилийн ой хангайн бүсийн уралдаан өнөөдөр сонгомол ангиллын морьдын уралдаанаар эхэлж буй. Шинэ цагийн адууны шандсыг шалгадаг энэхүү уралдаанд хэний ямар морьд түрүүлж, айрагдсаныг цуваанаас хараарай. 

Сонгомол дээд-54:

1.Төв аймгийн Алтанбулаг сумын уугуул, сумын Алдарт уяач Гансүхийн Хадбаатарын бор халзан. Халзан азарганы уяа сойлгыг Баянхонгор аймгийн Бууцагаан сумын харьяат аймгийн Алдарт уяач Чулуунбаатарын Амсарсанаа тааруулж, Ц.Дөлгөөн хүү унажээ. Халзан азарга хэдхэн хоногийн өмнө төрийнхөө наадамд аман хүзүүнд хурдалсан билээ.

2.Булган аймгийн Бугат сумын уугуул, Орхон аймгийн Баян-Өндөр сумын харьяат аймгийн Алдарт уяач Жамбалдоржийн Батсуурийн Цог хонгор азарга. Уяа сойлгыг аймгийн Алдарт уяач Д.Энхбаатар. Улсын наадамд 13-т хурдалсан.

3.Хөвсгөл аймгийн Рашаант сумын уугуул Цэрэндоржийн Амарсанаагийн хүрэн азарга

4.Архангай аймгийн Ихтамир сумын харьяат Б.Лувсанцэрэнгийн цоохор азарга. Уяа сойлгыг аймгийн Алдарт уяач Түвдэнгийн Ганчөдөр. Хэдхэн хоногийн өмнө Ихтамир сумын 100 жилийн ойд түрүүлсэн.

5.Архангай аймгийн Чулуут сумын уугуул Цэдэнсодномын Энхболдын хээр морь. Уяа сойлгыг аймгийн Алдарт уяач Адуучийн Нямбаатар. Өнгөрсөн улсад айрагдаж, Өвөрхангайн бүсэд түрүүлсэн.

 Сонгомол дунд-87: 

1.Архангай аймгийн Ихтамир сумын уугуул Жаргалсайханы Уясахын хээр. Уяа сойлгыг МУ-ын Алдарт уяач Э.Дашчийрэв. Хээр үрээ хэдхэн хоногийн өмнө төрийн наадамд аман хүзүүнд хурдалсан билээ.

2.Хөвсгөл аймгийн Мөрөн сумын уяач Шагдаржавын Хандсүрэнгийн хээр. Булган аймгийн баяр наадамд түрүүлсэн. Уяа сойлгыг аймгийн Алдарт уяач Доржийн Цээлхасүрэн.

3.Дундговь аймгийн Хулд сумын харьяат Будын Ариунболдын хээр. Уяа сойлгыг МУ-ын Алдарт уяач Г.Болдбаатар.

4.Сэлэнгэ аймгийн Баруунбүрэн сумын харьяат аймгийн Алдарт уяач Элдэв-Очирын Ариунболдын хээр. Өөрийн унаган. Орхон аймгийн баяр наадамд түрүүлсэн.

5.Дорноговь аймгийн Өргөн сумын харьяат Гончигийн Амгаланбаатарын Цом халзан. Бор халзан үрээний уяа сойлгыг Дундговь аймгийн Хулд сумын харьяат МУ-ын Алдарт уяач Дэмчигцоодолын Эрдэнэбулган тааруулжээ. Цом халзан үрээ өнгөрсөн жил буюу даагандаа зургаа түрүүлж, хоёр айрагдсан. 

Сонгомол бага:

1.Өвөрхангай аймгийн Уянга сумын уугуул аймгийн Алдарт уяач Давааноровын Ганбаатарын хүрэн халзан. Хэдхэн хоногийн өмнө улсын наадамд айргийн тавд хурдалсан. Халзан дааганы уяа сойлгыг Архангай аймгийн Өндөр-Улаан сумын харьяат, МУ-ын Алдарт уяач Шаравжамцын Бадамжунай тааруулсан.

2.Сэлэнгэ аймгийн Баруунбүрэн сумын харьяат аймгийн Алдарт уяач Элдэв-Очирын Ариунболдын хээр халзан.

3.Говь-Алтай аймгийн Халиун сумын уугуул МУ-ын алдарт уяач Гантөмөрийн Чинзоригийн хээр

4.Хөвсгөл аймгийн Рашаант сумын уугуул Амарсайханы Билигүдэйн хээр

5. Дорнод аймгийн Халхгол сумын харьяат А.Баттүшигийн халзан тус тус хурдаллаа.

Б.Хастөр